Sizi yaxından tanıyaq.
Mən, Qəhrəman Abbasovam.
Ali təhsilimi Ukrayna Dövlət Aviyasiya Akademiyasında Beynəlxalq İqtisadiyyat sahəsi üzrə təhsil almışam,.
Satınalma sahəsidə daha öncə Aztexnika, Aztikintiyol, BM Nəqliyyat, AFB Bank və ATA Sığorta şirkətlərində çalışmışam. Hazırda Satınalma Meneceri kimi “PashaPay” şirkətində çalışıram.
Satınalma meneceri kimi 10 ilə yaxın təcrübəm var. Bu sahədə bir çox böyükhəcmli layihələrdə iştirak etmişəm. İstehsalat, ağır texnika, inşaat, avtomobil servisi, yol-tikinti işləri, bank, sığorta və maliyyə təşkilatlarında çalışmışam.
Satınalma meneceri kimdir və hansı öhdəlikləri var?
Təəssüflər olsun ki, ölkəmizdə belə bir stereotip formalaşıb ki, satınalma meneceri sadəcə tender keçirib qiymət “öldürən” şəxsdir. Əslində isə satınalma menceri şirkətə fayda vermək üçün kənar xərclərin qarşısını alan və qənaət prinsipləri ilə çalışan vacib insandir.
Satınalma Meneceri şirkətin satınalma əməliyyatlarına nəzarət və təşkilatçılıq edən şəxsdir. O, şirkətlə əməkdaşlıq edən satıcıların, podratçıların, digər əlaqəli şirkətlərin ümumi ticarət əlaqələrinin idarə olunmasını və nəzarətini təşkil edir. Bununla paralel olaraq o sənədləşmə əməliyyatlarına nəzarət edir və imzalanacaq müqavilələr üzrə hüquqi sənədləri nəzarətində saxlayır. İllik satınalma büdcəsini formalaşdıraraq hesabatların hazırlanmasını təmin edir və şirkətin əsas xərc siyasətini formalaşdırır.
Satınalma menecerinin günlük işləri nədən ibarətdir? O hansı alətlərdən istifadə edir?
Günlük iş vaxtım başlayan zaman Satınalma Meneceri kimi ilk olaraq şirkətdə mövcud satınalma proqramında yaradılmış yeni tələbnamələr və hazırda prosesi davam edən tələbləri və tapşırıqları yoxlayıram. Mövcud tələbnamələr üzərindən şöbədə çalışan mütəxəssislərlə məşvərət və məsləhətləşmələr apararaq işlərə başlayırıq. Demək olar ki, hər gün şirkətdaxili şöbələrlə və strateji alışlarda iştirak edən partnyor şirkətlərlə danışıqlar aparıram. Gündəlik işlərimdən əsas vaxtımı alışların qaydalara uyğun aparılmasına, satınalma sistemində baş verən proseslərin nəzarətinə və inkişafına sərf edirəm. Həmçinin gündəlik əsas işlərimdən biri satınalma əməliyyatlarında istifadə olunan hüquqi sənədlərdə yoxlanılmasını və sifarişlərlə bağlı müzakirərələrin aparılmasıdır. Bundan əlavə problemli durumlarda müdaxilə edərək məsələlərin həll olunmasına cəhd göstərirəm.
Satınalma meneceri əməliyyatların nəzarəti və analitik təhlillər üçün istifadə etdiyi əsas alətlər aşağıdakılardır.
- Şikrətin Satınalma Proqramı
- Excel və Word proqramları
- Outlook
Satınalma meneceri digər hansı sahənin şəxsləri ilə sıx işləyir?
Əsasən şirkətin daxili şöbələri ilə (marketinq, IT, hüquq, maliyyə və s.) sıx əlaqədəyəm Lakin hər hansı irihəcmli layihələr zamanı dövlət təşkilatları ilə də müntəzəm əlaqəda oluram.
Məhz satınalma meneceri kimi işləməyə sizi nə həvəsləndirir? Motivasiyanız nədir?
Satınalma sahəsi digər sahələrə nəzərən rutin deyil. Bu sahədə maliyyə, risklərin təhlili, hüquqi qaydalar, logistika və satış sahəsini əhatə edən proseslər var.
Xarakter olaraq rutin işləri xoşlamıram. Mənə görə insan daima yeni məlumatlar öyrənməli və dinamik iş prinsipləri ilə çalışmalıdır.
Əsas motivasiya səbəbim bu işdə təşkilatçılıq işlərinin olması, layihələrin idarə olunması və yeni texniki biliklərin öyrənilməsidir.Satınalma meneceri çalışdığı şirkətin profilinə uyğun olaraq orada olan bütün texniki bilgilərə və işlərin aparılma funksiyalarına yiyələnir. Bundan əlavə yeni şirkətlərlə komnunikasiyaların qurulması və dünyada baş verən texnoloji və sənaye yeniliklərinin öyrənilməsidir. Məsələn, MilliÖN terminallarının satınalması prosesində xaricə səfər edəndə terminalların xüsusiyyəti, pul əsginaslarını sayan cihazın iş prinsipi, işlətdiyi enerjinin və internet traffikin həcmi və s. barədə o qədər maraqlı şeylər öyrənmişdim ki, artıq o qırmızı MiliÖN terminallarına baxanda sadəcə adi metal qutu yox, sanki canlı bir orqanizmi, bir insanı görməyə başlamışam.
Peşəkar satınalma meneceri olmaq üçün nələrə diqqət edilməlidir?
Satınalma meneceri öz sahəsində peşəkar olması mütləq bir zərurətdir və bunun üçün minimum tələb olunanlar aşağıdakılardır:
- Bu sahədə 3-5 il idarəçilik təcrübəsinə sahib olmalısız.
- İnsanlarla düzgün komunikasiya bacarıqlarını bilməlisiniz.
- Beynəlxalq səviyyədə qəbul edilmiş satınalma təlimlərində iştirak etməli, xarici dil biliklərini və kritik qərar vermə bacarıqlarını artırmalısız.
- Ticarətlərdə olan risk faktorlarını və hərhansı qeyri-qanuni ticarət proseslərini dəqiq təhlil etməlisiz.
- Hüquq və maliyyə qaydalarını yaxşı bilməli və ticarət aparma metodlarına sahib olmalısız.
- Çətin durumlarda və ağır şərtlər altında düzgün qərar verməlisiz.
Satınalma meneceri olmağın ən yorucu yaxud mənfi tərəfi nələrdir?
Bu işin ən yorucu və mənfi tərəfi aşağıdakılardır.
- Yerli şirkətlərdə satınalma sisteminin mövcud olmaması
- Böyük satınalma layihələri zamanı texniki spesifikasiyaların sifarişçilər tərəfindən düzgün hazırlanmaması
- Sifarişçilərin daim tələsməsi, prosesi ən tez bir zamanda istəməsi
Hazırda çalışdığım PashaPay şirkətində həm özümün, həm də digər komanda üzvlərim Gülya İsmayılova və Əli Eyvazovun sözün həqiqi mənasında baş qaşımağa belə vaxtı olmur. Tenderlər, kotirovka sorğuları, verndorların müqavilələri, daha münasib alternativ təklif verən şirkətin tapılması üçün bazar araşdırması – bunlar xeyli diqqət və iş yükü tələb edir. Daim stress altında işləmək bu işin əsas çətin cəhətidir.
Bu sahədə çalışmaq istəyənlərə nədən başlamağı tövsiyə edərdiniz?
Tövsiyyə edərdim ki, bu sahədə çalışmaq istəyən insanlar ilk öncə bu sahədə olan bütün müsbət və mənfi tərəfləri tam təhlil etməlidirlər.Bu təhlildən sonra çalışacaq insan öz xarakterinə (təbiətinə) uyğun olaraq bu sahəni yoxlayıb qərar verməlidir. Kimsə sırf maliyyə, pul qazanmaq səbəbindən bu sahədə çalışmaq istəyirsə, o zaman bir müddət sonra böyük demotivasiyaya məruz qalacaq.
Bu sahədə çalışan insanın xarakterində ən əsas 4 peşəkar xususiyyət olmalıdır.
- Dinamik və gərgin iş həyatını sevmək
- Bütün hallarda şəffaf çalışma fəaliyyətinə sadiq qalmaq
- Daima yeni təlimlərə qatılmalı və özünü inkişaf etdirmək.
- Qarşılaşacağı problemlərdə soyuqqanlı olmaq və kritik vəziyyətlərdə qərar vermə xüsussiyyətlərinə sahib olmaq
Daha bir vacib xüsusiyyət isə dürüst olmaqdır. Düzdür, əslində bu xarakter hamıda olmalıdır. Amma ələlxüsus da satınalma-təchizat sahəsində işləyən şəxslərdə dürüstlük, vicdan, şirkətin maraqlarını hər şeydən üstün tutmaq çox vacibdir.
Bir müddət bu sahədə işləyəndən sonra isə CİPS (Chartered Institute of Procurement and Supply), PMP kimi peşəkar sertifikatları almağı, müxtəlif seminar və konfranslarda iştirak etməyi tövsiyə edərdim.
Təcrübənizi və biliyinizi bölüşmək, məqalənizi göndərmək, daha çox insana fayda vermək istəyirsinizsə, [email protected] elektron ünvanına yazın.
