Motion designer kimdir və o nə iş görür? | Ceyhun Abdullayev fikirlərini bölüşür

Sizi yaxından tanıyaq.

Mən, Abdullayev Ceyhun Naxçıvan MR Culfa rayonunda anadan olub böyümüşəm.  Naxçıvan Dövlət Universitenin Dünya İqtisadiyyatı fakultəsini bitirmişəm. Universitet illərində Motion Design-a marağım olduğu üçün bu sahəni ikinci peşəm kimi görüb hazırlaşmışam. Daha sonra hərbi xidmətə yollanıb bitirdikdən sonra Bakıya gəlməyi qərara almışam. 2017-2018 ci illərdə qlobal şirkət olan “Lemon Digitals” ilə frilans Motion Designer kimi işləməyə başladım. Buradakı fəaliyyətim dövründə “KFC” və bir sıra Kripto şirkətlər üçün izahedici videoların hazırlanmasında iştirak etmişəm. Və buna paralel olaraq, “Caspian Crystal” şirkətində qrafik dizayner kimi işləyirdim. Daha sonra “PeopleBrand” şirkətində işləməyə başladım və bir müddət sonra Art Director vəzifəsinədək yüksəldim. 6 il müddətində “PeopleBrand” şirkətində yerli və qlobal şirkətlərlə işləmə şansım oldu. Bunlara “P&G” kimi nəhəng şirkətləri aid etmək olar. “P&G”-nin bir çox brendləri üçün (Ariel, Pantene, Head&Shoulders, Pampers və s.) animasiyalar və dizaynların hazırlanmasında yaxından iştirak etmişəm.

Həmçinin, bir çox yerli şirkətlər üçün “ABB”, “CİB”, “PashaPay” və s. izahedici videoların hazırlanmasında birbaşa iştirak etmiş və layihələrə rəhbərlik etmişəm. Hal-hazırda həmtəsisçisi olduğum “Animoore” studioda Creative Director olaraq fəaliyyətimi davam etdirir, CodeAcademy-də isə 2D Motion Designer müəllimi olaraq çalışıram.

Motion designer kimdir və hansı öhdəlikləri var?

Motion Graphic Design qısaltma olaraq Motion Design də adlandırılır. Motion designer film, reklam, televiziya və internet üçün animasiyaları hazırlayan şəxsə deyilir. Ölkəmizdə daha çox istifadə edilən Motion Design növü isə 2D Motion Graphic Design-dır. 2D Motion Graphic Designer isə izahedici videoların, mətnlərin, logoların, təqdimatların, web saytların və s. animasiyalı formada hazırlanmasını təmin edən şəxsə deyilir. 

Motion Designer-in öhdəlikləri

Motion Designer-in öhdəliyi  ona təqdim edilən dizaynları səhnələşdirib animasiya etməkdir. Amma təəssüflər olsun ki, bizim ölkədə bu belə deyil. Motion Design sahəsi ölkəmizdə ayrıca peşə sahəsi kimi inkişaf etmədiyi üçün əlavə olaraq digər biliklər də tələb olunur. Motion Designer-in əsas öhdəliyi hər hansı bir ideyanın formalaşmasında qrafik dizaynerə kömək edərək qrafik dizayner tərəfindən hazırlanan dizaynları animasiya etməkdir. Həmçinin professional Motion Designer tək alətlərdən istifadə edərək animasiya hazırlamamalı, həmçinin kadrlara kameraman və rejisor gözü ilə baxmağı bacarmalıdır. Əlavə olaraq, yaradıcı olmaq, verilən tapşırıqları zamanında və səlis olaraq yerinə yetirməlidir. Yaradıcılıq üçün isə daim trendləri izləmək, çoxlu praktika etmək və xarici Motion Designer-lərin paylaşımlarını izləmək lazımdır. 

2D Motion designerin günlük işləri nədən ibarətdir? O hansı alətlərdən istifadə edir?

Günlük işlərimiz iş yükünə uyğun olaraq dəyişə bilir. Bəzən web saytlar üçün animasiyalar hazırlayırıq, bəzən isə social media üçün dizaynlar edib animasiya edirik. Daha çox isə müxtəlif şirkətlər üçün izahedici animasiyalar hazırlayırıq. Günlük iş yükü isə müştərilərin istəyindən asılıdır. Bəzən çox işləməli olur, bəzən isə heç iş olmur, və nəticədə oyun oynamalı oluruq:)). Bəzi müştərilər isə 10 günə etdiyimiz işi 2-3 gün ərzində etməyimizi istəyir. Bu da gecə-gündüz işləməyimizə səbəb olur.
 

Animasiya hazırlayərkən istifadə etdiyimiz alətlər

İşin böyüklüyü və kiçikliyindən asılı olmayaraq çalışırıq hər bir iş üçün sketch təqim edək. Fikrimizi müştəriyə çatdırmaqda sketchin çox böyük rolu vardırr. Sketch mərhələsindən sonra storyboard hazırlayırıq. Və storyboard müştəri tərəfindən təsdiqləndikdən sonra Adobe İllustrator və Adobe Photoshop vasitəsi ilə kadrları hazırlayırıq. Daha sonra, hazırlanan kadrları Adobe After Effects proqramı vasitəsi ilə hərəkətə gətiririk.  After Effects daxilinə sonradan əlavə edilmiş pluginlər və scriptlərdən istifadə edərək animasiyanın hazırlanması müddətini sürətləndirir və keyfiyyətini artırırıq. Hətta animasiyanın bəzi kadrlarının daha maraqlı olması üçün Cinema4D və Blender kimi 3d proqramlardan da istifadə edirik. Animasiyanı hazırlayıb bitirdikdən sonra musiqi seçib, Adobe Premier və ya Adobe Audition vasitəsi ilə animasiyaya səs effektləri əlavə edirik. Və animasiya hazırdır.

Motion designer digər hansı sahənin şəxsləri ilə sıx işləyir?

Motion designer daha çox qrafik dizayner və illustrator ilə sıx işləyir. Çunki bu iki sahə bir-birini tamamlayır. Daha sonra bu siyahıya Art Director, Creative Director, Copywriter və Marketing işçilərini daxil etmək olar. Motion dizayner ideyanın formalaşmasından yekun nəticəyədək bütün mərhələlərdə iştirak etməli və proyektə öz töhfəsini verməlidir. Hətta motion dizayner çəkilişlərdə iştirak edərək çəkiliş prosesi ilə də tanış olmalıdır.

Məhz Motion designer kimi işləməyə sizi nə həvəsləndirir? Motivasiyanız nədir? 

İlk olaraq işlərin maraqlı və sıxıcı olmaması bu işi görməyə daha çox həvəsləndirir. Hətta deyə bilərəm ki, günün 20 saatını da işlədiyimiz günlər olub və işimdizdən sıxılmadan zövq almışıq. Və işin ən motivasiya edici hissəsi isə, sonda nəticənin yaxşı olması və həmin işə baxaraq zövq almaqdır. Bu bütün iş yükünü üzərindən götürmüş olur.
Digər tərəfdən, qlobal bazarda və bir çox ölkələrdə bu sahədə iş tapa bilmək və frilans olaraq işləmə imkanının  olmasıdır. Bu zaman portfolioyaya maraqlı işlər əlavə edə bilirsən. Hətta professional dizayner və animatorlar ilə işləmək imkanınız yaranır və onların təcrübəsindən faydalana bilirsiniz.
Əgər gördüyünüz işdən zövq alırsınızsa bu zaman maddiyat 2-ci və ya 3-cü plana keçə bilir.

Peşəkar Motion designer olmaq üçün nələrə diqqət edilməlidir?

Peşəkar motion designer olmaq üçün istifadə edilən proqramları dərindən öyrənmək və proqram biliklərindən əlavə animasiyanın 12 prinsipini dərindən mənimsəmək lazımdır. Animasiya edilməsi üçün qoyulan açarlar ilə işləməyi bacarmalıdır. Sürət və dəyər qrafikasından düzgün və mütəmadi istifadə etməlidir. “Timing” vaxt bölgüsünü düzgün etməli və açarları düzgün, dəqiq və səlqəli qoyduğundan əmin olmalıdır. Proyektləri maksimum səliqəli işləməli, düzəliş istənildikdə tez bir zamanda edit etməyi bacarmalıdır. Və peşəkar Motion Designer “Problem Solver” olmalıdır. Problem yarandıqda onu tez bir zamanda həll etmənin yollarını düşünməlidir.

Motion designer olmağın ən yorucu yaxud mənfi tərəfi nələrdir?

Motion designer-in yorucu tərəflərindən biri verilən tapşırığın çox qısa müddətdə hazır olmasını istənilməsidir. Bəzi şirkətlərdə heç düşünməyə belə vaxt verilmir))
Digər mənfi tərəfi isə müştərinin gördüyü çox şeyi animasiyada istəməsi. Bu da animasiyanın hazırlanma prosesindən məlumatlarının olmamasından qaynaqlanır.
Digər vaxt alan və yorucu tərəf isə axtardığınız resursların az olması və məlumatların tapılmasında çətinlik çəkməkdir. Bunun üçün ingilis və rus dillərini axtarış edə biləcək səviyyədə öyrənmək faydalıdır.

Bu sahədə çalışmaq istəyənlərə nədən başlamağı tövsiyə edərdiniz?

Tövsiyə edərdim ki, bu sahə ilə tanış deyilsə və yeni başlayırsa ilk olaraq araşdırma etsin və özünü bu sahədə görürsə davam etsin. Və ilk olaraq qrafik dizaynı orta səviyyədək öyrəndikdən sonra motion design-a başlasın. Çünki öz hazırladığı dizayn nümunələrini animasiya edərək öyrənmək daha rahat və effektivdir. Motion Design-ı yeni öyrənməyə başlayanlara məsləhətim animasiyanın 12 prinsipindən başlasınlar. Azda olsa ingilis dili biliyinin olması bu sahəni daha yaxşı öyrənmək üçün üstünlükdür. Çünki öyrənərkən qarşılaşacağı xətaları ingiliscə axtararaq daha tez tapa biləcəklər.
İlk başlarda öyrənmək çətin görünə bilər, amma biz tələbələr ilə 2 dərsdən sonra animasiyalar hazırlamağa başladıq. Ən əsası isə həvəs, səbr və öyrənmə istəyidir. 

Təcrübənizi və biliyinizi bölüşmək, məqalənizi göndərmək, daha çox insana fayda vermək istəyirsinizsə, [email protected] elektron ünvanına yazın.