Sizi yaxından tanıyaq
Mən, Şirin Mahmudova, PashaPay MMC şirkətində “Maliyyə nəzarətçisi” vəzifəsində çalışıram.
Ali təhsilimi Azərbaycan Dövlət İqtisadiyyat universitetinin “Ümumi İqtisadiyyət” fakültəsində almışam.
2012-ci ildə 3-cü kursda oxuyarkən, hazırda işlədiyim şirkətin Zəng Mərkəzi təmsilçisi kimi işə başlamışam. 10 aydan sonra çalışdığım şöbənin rəhbəri olmuşam. Şirkətin Zəng Mərzkəzi sisteminin təkmilləşdirilməsində yaxından iştirak etmişəm. Bütün Müştəri xidmətləri proses və prosedurların yaradılması procesinin sahibi olmuşam. İşlədiyim müddət ərzində fərqli təlim və tədris proqramlarında iştirak edib, sertifikatlar almışam. 2 ildən sonra, 2013-cü ildən tək Zəng Mərkəzi deyil, ümumiyyətlə Müştəri Xidmətləri şöbəsinin rəhbəri vəzifəsinə təyin olunmuşam. Şirkət daxili Müştəri Xidmətləri, MS Office proqramları üzrə təlimlər də vermişəm.
2 il çalışdıqdan sonra işlədiyim şirkətdə biznes proseslərini mükəmməl bildiyimə görə yeni yaranmış Daxili Nəzarət və Hesabatlılıq şöbəsinə rəhbər təyin olunmuşam. Bu şöbənin yaranmasını, proseslərin qurulmasını koordinasiya etmişəm.
Bu sahədə 4 il işlədikdən sonra şirkət daxili Maliyyə Nəzarətinə keçmişəm. Burda da şöbənin yaranmasında sıfırdan iştirak etmişəm😊. İşlədiyim peşə üzrə müxtəlif kurslar bitirib, sertifikatlar almışam. Hər bir tutduğum vəzifədə işimi çox böyük məmnuniyyətlə yerinə yetirir və çox sevirəm. Hələ də öz üzrəimdə işləyib, yenilikləri öyrənməyi davam edirəm.
Maliyyə nəzarətçisi kimdir və hansı öhdəlikləri var?
Maliyyə nəzarətçisi şirkətin vəsaitinin tətbiq edilən prinsip, normativ və qaydalara görə düzgün və səmərəli xərclənməsinə nəzarət edən şəxsdir.
Maliyyə nəzarətçisinin öhdəlikləri ümumi olaraq aşağıdakılardır:
- Büdcənin hazırlanmasında iştirak etmək
- Xərclərin büdcəyə uyğun xərclənməsinə nəzarət etmək
- Ödənilməsi lazım olan hesab-fakturaları təsdiq etmək
- Büdcə fərqlərini izləmək, təhlil və hesabat etmək
- Maliyyə nəzarəti fəaliyyətini yaxşılaşdıracaq siyasət və ya prosedurlarda dəyişikliklərində iştirak etmək
Maliyyə nəzarətçisinin günlük işləri nədən ibarətdir? O hansı alətlərdən istifadə edir?
Hər gün səhər ilk öncə daxil olan sorğuları analiz edirəm, hər hansı çatışmazlıq və ya uyğunsuzluqlar olanda, bunu sorğu göndərən şöbələrlə müzakirə edirik.
Daxil olan sorğuları təstiq olunmuş büdcə ilə yoxlayıram. Məsələn, gələn invoysda məbləğ 3000 manat yazılıb, amma təsdiq olunmuş büdcədə isə 2500 manat qeyd olunubsa, dərhal sorğu göndərən şöbəyə bildirirəm.
Satınalma əməliyyatlarında istifadə olunan hüquqi sənədləri yoxlayıb, müvafiq sistemdə qeyd edib, ödəniş üçün mühasibatlığa təqdim edirəm.
Maliyyə sənədlərini nəzərdən keçirib, təsdiq edib rəhbərliyin imzasına təqdim edirəm.
Gündəlik işlədiyim proqramlar şirkətin satınalma proqramı və MS Office paketinə daxil olan proqramlardır.
Kağız sənədlərlə çox işlədiyimə görə şirkətdə skaner, printer və s.-dən ən çox istifadə edənlərdən biri də mənəm.
Maliyyə nəzarətçisi digər hansı sahənin şəxsləri ilə sıx işləyir?
Şirkətin bütün mal və xidmət alışı Maliyyə Nəzarətindən keçdiyinə görə deyə bilərəm, ki şirkətin bütün şöbələri ilə sıx işləyirəm. Nəyisə ödəmək lazımdırsa, dərhal yada Şirin düşür🙂. Amma daha çox işlədiyim komandalar aşağıdakılardır:
- Satınalma- məlum məsələdir.
- Maliyyə -özüm də Maliyyə departamentinin daxilində işlədiyim üçün mühasibat, ödəniş, xəzinədarlıq, büdcələmə və s. şöbələrlə sıx ünsiyyətdə oluram.
- Hüquq – tez-tez sənədlərdə hüquqi çatışmazlıq, hüquqşünasın rəyi, müqavilələrə təkrar baxış lazım olur.
- Marketinq – bizim şirkətdə ən çox pul ödənişləri əsasən marketinq (reklam yerləşdirmə, agentliklərə ödəniş, podratçılara avans vermək və s.) şöbəsindən gəlir.
Ümumiyyətlə isə, vəzifəsindən və işlədiyi şöbəsindən asılı olmayaraq insanlarla işləməyi, yardım etməyi çox sevirəm.
Məhz Maliyyə nəzarətçisi kimi işləməyə sizi nə həvəsləndirir? Motivasiyanız nədir?
Güclü və təcrübəli liderlərlə işləmək mənim motivasiyamdır. Hər gün yeni nəsə öyrənmək məni çox motivasiya edir.
Dinamik inkişaf, xoş ab-hava, yaxşı iş şəraiti, komanda və mühit də çox önəmlidir. Hər gün işə yüksək əhval ruhiyyə ilə gəlirəm. Çünki əminəm ki, insan nəyi ötürürsə, bu ona qayıdır.
Peşəkar Maliyyə nəzarətçisi olmaq üçün nələrə diqqət edilməlidir?
Peşəkar Maliyyə nəzarətçisi olmaq üçün Maliyyə sahəsində təcrübə vacibdir.
Bir şirkətin peşəkar maliyyə məzarətçisi olmaq üçün həmin təşkilatın biznes və strategiyalarını mükəmməl bilməlisən. Fikrimcə, bu təkcə maliyyə nəzarətçisinə aid deyil: əslində hər bir peşəkar işçi işlədiyi şirkəti anlamalı, şirkətin hansı istiqamətdə inkişaf etdiyini, hansı hədəfləri, prioritetləri olduğunu mükəmməl bilməlidir. Sən şirkəti yaxşı tanımalısan və bütün prosesslərdən xəbərin olmalıdır. Ümumilikdə peşəkar işçi hərtərəfli inkişaf etmiş, universal kadr olmalıdır.
Məsələn, “m10 ilə Bravo-da alış-veriş et, 3% keşbek qazan” kampaniyası başlamamışdan qısa müddət əvvəl əvvəl marketinq şöbəsindən mənə reklam yerləşdirməklə bağlı ödəniş sənədləri gəlmişdi. Mən başa düşürdüm ki, vaxt azdır, kampaniya tez başlamalıdır, reklam bannerlərimiz tez çap olunmalıdır. Ona görə də İT şöbəsindən gələn sorğuları yox, məhz marketinqdən gələn ödənişlərin prioritetini yüksək qoydum, birinci növbədə onların işini etməyə başladım.
Maliyyə nəzarətçisi olmağın ən yorucu yaxud mənfi tərəfi nələrdir?
Şöbələrdən daxil olan tələbin həmişə təsdiqlənmiş büdcədə olmaması 🙂
Düzdür, bu mənim işimi artırır, daha dəqiq olmağımı tələb edir. Amma bundan əsəbiləşmir, anlayışla qarşılayıram. Çünki biz elə bir dinamik zamanda yaşayırıq ki, hər şey tez dəyişir, qərarları tez-tez dəyişməli olursan.
Məsələn, bir influnserə reklam ödənişi üçün sənədlər bugün mənə verilir. Amma marketinq şöbəsi görür ki, həmin bloggerin reklamı çox effektivdir və ona yaxın günlərdə əlavə bir video çəkməyi də tez sifariş edir. Məcbur olub bəzən həmin ödəniş dayandırılır/dəyişdirilir/məbləğdə korreksiyalar olunur və s.
Həm zamanın, həm də işlədiyim yerin çox çevik olmağını başa düşdüyüm üçün bunu anlayışla qarşılayıram.
Mən 11 illik professional iş təcrübəmdə işimə yüksək həvəs və sevgi ilə yanaşmışam. Buna görə işimdə mənfi tərəflər olduqda, tez çıxış yolu tapıram və bu hal mənim üçün artıq mənfi deyil, müsbətə çevrilir.
Bu sahədə çalışmaq istəyənlərə nədən başlamağı tövsiyə edərdiniz?
Tövsiyə edərdim ki, hansı yaşda olursan ol, mütləq hər gün yeni yeni nəsə öyrənməlisən, ruhdan düşməməlisən. Məsələn, hazırda Maliyyə sahəsində çalışmağıma baxmayaraq, həmçinin Data Analitika tərəfdən də özümü inkişaf elətdirirəm.
Bu tək biliklərə aid deyil, həm də soft skills-lər üçün də keçərlidir; misal üçün ətrafindaki insanların yaxşı, nümunəvi davranışlarından özünə nəticə çıxarmalısan. Özündə olan mənfi xüsiyyətlərin üzərində işləməlisən, daim feedback-lərə açıq olmalısan.
Hər bir peşəkar və uğurlu insanın hekayəsində əminəm ki, ən aşağı vəzifədən başlayıb, ən yüksək zirvələrədək ucalmaq var!
Təcrübənizi və biliyinizi bölüşmək, məqalənizi göndərmək, daha çox insana fayda vermək istəyirsinizsə, [email protected] elektron ünvanına yazın.
