Sizi yaxından tanıyaq.
I’m a woman, I’m a mom, I’m an HR expert.
Məni təsvir edən əsas sözlər bunlardır, hər biri məni xoşbəxt edən amil və eyni zamanda mənim həyatımda təməl saydıqlarımdır.
Özüm haqqında qısa məlumat verim, Nisə Əbülhəsənova, 1992-ci ildə anadan olmuşam. Ali təhsilliyəm, Azərbaycan Dövlət İqtisad Universitetində bakalavr təhsilimi, Azərbaycan Dövlət Neft və Sənaye Universitetində MBA bitirmişəm. Artıq 8 ildən artıqdır ki iş həyatındayam. Fərqli şirkətlər, fərqli departamentlər və fərqli iş mühitlərində çalışma şansım olub. Bu illər ərzində möhtəşəm insanlar tanımış, çox gözəl əlaqələr qurmuş və karyeramın hər dönəmindən zövq alaraq, öyrənərək və bəzən səhvlər edərək, bu gün HR mütəxəssis kimi fəaliyyətimlə xoşbəxtəm. Təcrübə qazandığım, fərqli sahələrdən və insanlardan öyrəndiklərimlə özümə çox əsaslı təməl qurduğuma inanıram.
Hazırda isə PashaPay şirkətinin HR koordinatoruyam.
HR koordinator kimdir və hansı öhdəlikləri var?
HR koordinator vəzifəsi fərqli şirkət və strukturlarda fərqli öhdəlikləri özündə cəmləyir. HR koordinator əslində “HR generalist” pozisiyası ilə yaxındır, çünkü bu pozisiyada olan əməkdaş çoxfunksional HR mütəxəssisi deməkdir.
HR koordinator strukturlar arasında əməkdaşlığın güclənməsinə, əlaqələrin və kommunikasiyanın lazımi səviyyədə aparılmasına xidmət göstərir. Həmçinin, gərəkli olduğu halda HR şöbəsi daxilində fərqli öhdəliklərə yönəlmə potensiyalına malikdir. Məsələn, işə qəbul üzrə dəstək, yeni əməkdaşların cəlbi, komanda daxili adaptasiyası, daxili kommunikasiya, komanda daxilində əlaqələrin gücləndirilməsinə dair fəaliyyətin həyata keçirilməsi və tədbirlərin təşkili, idarəetməsi.
Öz şirkətimizdə bu struktur vahidi çox maraqlı və aktiv bir pozisiyadır. Şirkətimizin yeni olduğunu, ambisiyalarımız çox olduğunu nəzərə alaraq rahatlıqla söyləyə bilərəm ki, bizim şirkət üçün seçilən HR yanaşma bazarda yenidir. Sağlam və çoxfunksional HR qurmaq naminə yola çıxmışıq.
HR koordinator şirkətin korporativ mədəniyyətin formalaşmasında böyük rola malikdir. Gəlin bir daha vurğulayaq ki, korporativ dəyərlərin yaranmasında HR-ın rolu əvəzolunmazdır.
HR koordinatorun günlük işləri nədən ibarətdir? O hansı alətlərdən istifadə edir?
Günlük işlər prioritetlərə və əsas cədvələ görə dəyişir. Məsələn, komanda quruculuğu (team-building) tədbirlərinin təşkili zamanı əsas prioritet HR-ın təşkilatçı olmasıdır. Yaxud, aqressiv işə qəbul fazasında onun rolu yeni əməkdaşların cəlbinə dəstək, olduqca çox yeni potensial namizəd axtarışı, onlarla kommunikasiya qurmaq, müsabiqələr və müsahibələrin aparılmasıdır.
Sizə burada planlı şəkildə günlük işlərimi sadalamaq istərdim, amma ki bu mümkün deyil:). Çünki heç bir günüm digərinə bənzəmir, heç bir gün özündə eyni işləri əhatə etmir. Elə HR koordinator işinin maraqlı və həyəcanlı tərəfi də məhz budur.
Elə hesab edin ki, bir qaynayan ocaq var, sən isə onun içində aktiv şəkildə fəaliyyət göstərməli, tez reaksiya verməli və rahatlıqla yeniliklərə adaptasiya olmalısan.
HR koordinator digər hansı sahənin şəxsləri ilə sıx işləyir?
Nəinki HR koordinator, məncə HR daxilində hər bir kəs ilk öncə komanda yoldaşları və daha sonra bütün şirkətin əməkdaşları ilə sıx işləməlidir. Hər əməkdaşı bir-bir tanımaq, onlarla müzakirələr etmək, onlara yaxın olmaq əsas məqamlardandır. HR koordinator dəstək olduğunu, dinləyici və haqlı səs sahibi olduğunu əməli və hər zaman əməkdaşlara qarşı dəstəyi ilə sübut etməlidir.
Hər bir şirkətin strategiyası var. Hədəflərə nail olmaq üçün hazırlanan bir yol xəritəsi mövcüddür. HR o yol xəritəsinə bir neçə yöndən dəstək göstərməkdədir. Ilkin olaraq produktiv işə qəbul (rekrutinq) vacibdir. Hədəfə çatmaq üçün əməkdaşlara ehtiyac var, bu əməkdaşları cəlb edən, işə qəbul edib, şirkətə qazandıran HR-dır. Digər tərəfdən komanda daxili sağlam mühitin yaranması, əlaqələrin gücləndirilməsi, produktiv fəaliyyət üçün şərtlərin təmin olunması da məhz HR şöbəsinin əməkdaşlarının funksiyasıdır.
Məhz HR koordinator kimi işləməyə sizi nə həvəsləndirir? Motivasiyanız nədir?
Kommunikasiyanı, insanlarla işləməyi, onların suallarına birgə cavab axtarmağı, hansısa problemləri yarananda həll etməyi çox sevirəm. Hər bir insan bir dəryadır, yetər ki, doğru yöndə və doğru anda bunun fərqinə varasan.
İnsan resursları sahəsinin məni əsas cəlb edən tərəfi məhz insanlarla işləmək olmuşdur. Mən bununla xoşbəxt oluram, bunu özümə heç bir halda iş və əziyyət olaraq görmürəm və bu səbəbdən işimi sevir və hər anından zövq alıram.
Peşəkar HR koordinator olmaq üçün nələrə diqqət edilməlidir?
İlk növbədə insanları sevmək vacibdir. İnsanların fərqli olduğunu anlamaq, hər kəsə fərdi yanaşmanın vacib olduğunu unutmamaq, EMPATİYA duyğusuna malik olmaq və yaxşı dinləyici olmaq deyərdim. HR bir çox funksiyanı əhatə edən sahədir; o bəzən təmkin, bəzən soyuqqanlılıq, bəzən müdriklik, bəzən aşırı çox enerji, bəzən isə əksinə sakitlik tələb edir. Bu halların arasında itməmək, düzgün qiymətləndirmə aparıb, zamanında və operativ dəstək göstərmək asan iş deyil.
Kimsə HR koordinator olmaq asandır deməməlidir, bu əslində çox gözəl və çox özəl peşədir.
Bu sahədə çalışmaq istəyənlərə nədən başlamağı tövsiyə edərdiniz?
Tövsiyə edərdim ki, ilk öncə özləri hansı HR mütəxəssis ilə çalışmaq istəyərlər sualına cavab versinlər.
HR mütəxəssisi üçün dostcanlı, səmimi, açıq sözlü, hər zaman ədalətli və dürüst olmaq vacibdir.
Ilkin olaraq kommunikasiya bacarıqlarını gücləndirməyi tövsiyə edərdim. Yaxşı dinləyici olmaq asan deyil.
Fərqli təcrübə proqramlarında özlərini sınamağı, kitablar oxumağı, HR-ekspertlərdən məsləhət almağı, fərqli şirkətləri və onların HR strategiyalarını analiz etməyi tövsiyə edirəm.
Maraqlısı odur ki, HR peşəkarı maliyyəçi deyil, o rəqəmlərlə deyil, insanlarla çalışır və burada heç bir düstur yoxdur, yanaşma və situasiyalar çox fərqli ola bilir. Bunları nəzərə alaraq, bu sahədə çalışmaq üçün vacib olan insanlarla düzgün münasibətlər qurmağı bacarmaqdır.
Əminəm ki, ölkəmizdə çox gözəl HR işçiləri yetişəcək və HR anlayışı layiq olduğu səviyyəyə yüksələcəkdir. Burada hər birimizin rolu böyükdür, sağlam şəkildə bu sahənin inkişafına öz tövhəmizi verə bilərik.
Bizim sahib olduğumuz ən dəyərli şey zamandır. Gənclərə tövsiyəm - zamanı doğru qiymətləndirmək, öyrənmək və yeniliklərə açıq olmaq. Bizlərə öyrədilən “səhv etmək çox pisdir” anlayışı var, əslində isə səhvlər çox gözəl motivasiya və təkan verən amillərdir. Bu səbəbdən gənclərə sınamağı, səhv etməkdən qorxmamağı tövsiyə edirəm. Bir nöqtədən digərinə irəliləmək üçün sınamaq, bəzən qırıb tökmək lazımdır, heç bir inkişaf dağıntısız əmələ gəlmir.
Gənclərimizə özlərinə qarşı diqqətli və hörmətli olmalarını diləyirəm. Sahib olduqları ən dəyərli varlığın özləri olduğunu unutmasInlar.
Təcrübənizi və biliyinizi bölüşmək, məqalənizi göndərmək, daha çox insana fayda vermək istəyirsinizsə, [email protected] elektron ünvanına yazın.
