Sizi yaxından tanıyaq.
Salam. Adım Nəzrin Kərimovadır. Ali təhsilimi Azərbaycan Dövlət Neft və Sənaye Universitetində almışam, ixtisasım “Dünya iqtisadiyyatı” olub.
Hal-hazırda Məhsul Sahibi, yəni Product Owner kimi PashaPay şirkətində çalışıram. Artıq 4 ildən çoxdur ki, bu sahədəyəm. Öncə eyni vəzifəni Bank VTB Azərbaycan və Azerconnect şirkətlərində tutmuşam.
Product owner kimdir və hansı öhdəlikləri var?
Bildiyimiz kimi, Scrum komandasının tərkib hissəsi Scrum Master, Developerlər və Product Owner-dir. Burada Product Owner komandada bir rol almış iştirakçıdır.
Daha geniş nöqtəyi nəzərdən, Product Owner məhsulun bazarda tutulmuş mövqeyindən son dərəcədə məlumatlı, Sprintin planlaşdırılması zamanı biznes məqsədini irəli sürən və eyni zamanda məhsulun inkişafında həm strategiya, həm də taktikaya təsir edən bir "oyunçudur". Çox vaxt product owner-ə qısa olaraq “PO” deyirlər.
Product ownerin günlük işləri nədən ibarətdir? O hansı alətlərdən istifadə edir?
Product Owner məhsulun komponentlərin hazırlanma ardıcıllığını təyin edir. O, komandaya inkişaf etdirilməli olan funksionalı təqdim edir, tapşırıqları prioritetləşdirməklə məhsulun dəyərini maksimuma çatdırmağa çalışır. Gündəlik olaraq bu tipli suallarla qarşılaşır:
- Niyə saytda desktop versiyada retention pis olduğu halda mobil tətbiqdə yaxşıdır?
- Developerin vaxtı az, bug sayı isə çoxdur. Birinci hansı bug-ları fiks etmək lazımdır?
- Növbəti ay growth rate 60% artırmaq üçün hansı yeni mexanikanı təklif edim?
- Nə dərəcədə əminəm ki, UX-dizaynerin təklif etdiyi yeni ikonlar konversiyanı artıracaq?
- Bu tapşırığı Discovery mərhələsindən çıxarıb To-Do siyahısına salmağa dəyərmi?
Gün ərzində özü-özünə ən çox sual verən insanlar məncə filosoflar deyil, məhz PO-lardır.
Sprint zamanı PO Developerlərə sıx ünsiyyətdə olur, daim onların bekloqun elementlərini düzgün anlamaqları üçün sualları cavablandırır.
Alətlərə gəlincə, prioritetləşmə bacarığı mühüm rol oynadığından, bekloq prioritetləşdirmə alətindən daim istifadə edirəm. Bu ya ICE, ya MoSCoW ola bilər.
Product owner digər hansı sahənin şəxsləri ilə sıx işləyir?
“Hansı sahənin şəxsləri ilə işləmir” soruşsanız daha asan olardı. ? Çünki PO hamı ilə işləyir. PO vaxtının 50% müştərilər və stakeholderlər ilə keçirdir, yerdə qalan 50% komanda ilə birgə olur. Bu həm sırf developmentə baxan həmkarlar (proqramçılar, DevOps və s.), həm də marketinq mütəxəssisləri, UX/UI dizaynerlər, kopirayterlər, maliyyəçilər və hüquqşünaslar ola bilər.
Adətən şirkətdə hamını ən yaxşı tanıyan, hər şeydən xəbərdar olan şəxslər adətən product owner-lər olur.
Məhz Product owner kimi işləməyə sizi nə həvəsləndirir? Motivasiyanız nədir?
Mənim üçün əsas odur ki, müştərilər məhsuldan arzuolunan nəticəni alsınlar. Götürək elə hazırda üzərində çalışdığım m10 mobil tətbiqini. Bu tətbiq tamamilə müştərilərin rəyi və gözləntiləri əsasında qurulub, xeyli sayda intervyuların, sessiyaların nəticəsində ərsəyə gəlib. Müştərilərin istəyi komissiyasız pul köçürmək və ödənişlər zamanı sərfəli keşbek qazanmaq idi ki, biz də ən effektiv çıxış yolunu tapdıq: həlli m10-da! Bu tətbiq bir elektron pul kisəsidir, hansı ki sadalanan tələbləri tam qarşılayır.
Bu yaxında bir ağsaqqal kişi m10 tətbiqi ilə qaz pulunu tez ödəyib üstəlik 2% keşbek də qazananda dedi ki, “Allah bunu çıxardanın canını sağ eləsin”? Təsəvvür etməzsiniz, səhəri gün necə böyük bir ruh yüksəkliyi ilə işə başladım. Yeni bir bonus mexanikasının tətbiqi üçün xeyli vaxt tələb edən şeyi digər həmkarlarımla qısa müddətdə tətbiq etməyi bacardıq.
Peşəkar Product owner olmaq üçün nələrə diqqət edilməlidir?
- PO-da qərar vərmək bacarığı güclü olmalıdır, amma təkəbbürlü də olmamalıdır, verdiyi qərarların möhkəm əsası, arqumenti olmalıdır.
- Hər zaman müştəri məmnuniyyətinə üstünlük verməlidir. Bir növ şirkətdə müştərinin təmsilçisi olmalıdır.
- Yeniliklərə və eksperimentlərə açıq olmaq da bu işdə çox vacibdir.
Product owner olmağın ən yorucu, yaxud mənfi tərəfi nələrdir?
Hər işdə olduğu kimi, Product Owner olmaq da səbr tələb edir. Time-management də vacibdir, çünki bir anlıq belə gecikmisənsə başqası sənin bazardakı yerini tutacaq.
İşin normal getməsi üçün gah developer-lərin nazıyla oynamalı olursan, gah əsəbiləşirsən, gah Slack proqramında onu bombardman edirsən?
Stressə davamlı olmaq, çətin anlarda başını itirməmək üçün daim tonusda olmalısan ki, bu da çox adamı yorur. Ona görə də məhsul sahibi gərək psixi cəhətdən güclü olmalısan.
Bu sahədə çalışmaq istəyənlərə nədən başlamağı tövsiyə edərdiniz?
İlk öncə özünüzə sual verin: bu challenge-a hazırsız ya yox? Əgər hec olmasa bir az tərəddüd edirsinizsə, işdən vaz keçin, çünki bu peşə ruhən güclüləri sevir. Gecə 11-də kritik bug yarandığı barədə xəbər alanda qonaqlıqda noutbuku açıb işləməyə hazır olmağı bacarmaq lazımdır.
Hər zaman öz üzərinizdə çalışmağı davam edin, tez-tez bazar araşdırmalarına üz tutun, məhsul istehsalı üçün ən uyğun olan Scrum framework-unu mənimsəyin və şirkətiniz üçün adaptasiya edin. Bunları etsəniz, nəticə özünü çox gözlətməz.
Təcrübənizi və biliyinizi bölüşmək, məqalənizi göndərmək, daha çox insana fayda vermək istəyirsinizsə, [email protected] elektron ünvanına yazın.
